domingo, 25 de setembro de 2022

¡¡NOVA PROPOSTA!!

Todas e todos preparados?, a biblioteca abre un curso máis as súas portas, será o Luns 3 de outubro.
Como todos os anos, agardo a vosa visita nos recreos, nos días que tendes asignados por curso.
Xa coñecedes a proposta sobre a que imos investigar este ano, foi elixida por todas e todos vós, e sei que é un tema que vos interesa moitíiiiisimo: 
"POKÉMONS NA BIBLIOTECA"
Desta volta non precisades máis pistas, pero teremos moitos datos sobre o seu mundo que seguro vos van sorprender. 
Na pestana de "Os noso proxectos" deste blog xa podedes atopar algúns recursos para utilizar, pronto haberá máis.
Estade atentas e atentos as novas propostas e man a man desfrutaremos de cada descubrimento.
E para comezar, aquí deixamos un par de vídeos:


xoves, 8 de setembro de 2022

CHEGOU SETEMBRO E...

Benvidos e benvidas de novo ao cole.
O curso 2022-2023 xa botou a andar e a biblioteca está preparando novas sorpresas.
Temos propostas para investigar e divertirnos xuntos, moi pronto recibiredes pistas ao respecto pero mentres e para comezar deixamos este vídeo que esperamos sexa do voso agrado:

domingo, 19 de xuño de 2022

"Novo Proxecto e Boas Vacacións"

Seguro que estades intrigadas e intrigados pensando cal das propostas foi a gañadora, queredes sabelo xa???

Pois, "POKÉMOS NA BIBLIOTECA", vai ser a proposta de traballo para o vindeiro curso. Esperamos que vos guste e á volta das vacacións de verán veñades cargados de enerxía e moitas ideas para axudar a Piquín na súa investigación.

E con esta nova, despídese Piquín de todas e todos vós, non sen antes agradecer especialmente a bibliotecarias e bibliotecarios o seu traballo e esforzo por colaborar na xestión da biblioteca na hora do recreo. Moitas grazas a todo este alumnado e profesorado voluntario, sen a vosa axuda manter a biblioteca aberta no recreo sería imposible.

Boa andadura no voso camiño e moita sorte na nova etapa de Secundaria.

Para as e os demais, vémonos en Setembro.

¡¡BOAS VACACIÓNS!!

mércores, 15 de xuño de 2022

"A CACA CUCA"


Esta semana tivemos a gran sorte de ter no cole á Irene Alonso, autora do conto "A Caca Cuca" da editorial Galaxia. 
Fixo para todas as nenas e nenos de Ed. Infantil unha fantástica sesión de contacontos que desfrutaron moitísimo. Unha historia, que tenta amosar ás pequenas e pequenos, a importancia da recollida das cacas dos cans para que as rúas queden limpas.
Moitas grazas a Irene e Cristóbal por compartir un fermoso ratiño con nós e por suposto, a Bruno por permitírllelo.

mércores, 8 de xuño de 2022

"Novo Proxecto"

Este curso está rematando, pero Piquín xa está a argallar novas sorpresas para o 22-23. 
Leva días pensando: que lles gustaría investigar aos rapaces e rapazas?
E... decidiu preguntar a todas e todos, así que votade as vosas propostas na aula e logo entre todo o cole acordaremos sobre o que traballaremos no vindeiro curso.  
Parécevos boa idea? Pois adiante!!
Cal será o vindeiro proxecto?
Pronto teredes aquí a vosa resposta


xoves, 2 de xuño de 2022

"Guía de lecturas para o verán"

 Xa están chegando as vacacións e nós xa temos preparada a nosa Guía de Lecturas. Aínda quedan unhas semanas de clase, pero para que vaiades preparando a vosa mochila de praia, río, piscina... sempre cun libro a man!! 




"Día do Medio Ambiente 22"

"Una sola Tierra"
En el universo hay miles de millones de galaxias,
en nuestra galaxia hay miles de millones de planetas,
pero sólo hay una Tierra.

O día 5 de Xuño celébrase o "Día Mundial do Medio Ambiente". Este ano, co lema "Unha soa Terra" preténdese concienciar sobre o calentamento climático, a perda do hábitat e a contaminación do aire, terra e auga.
No cole, co proxecto "A Horta-Xardín de Piquín", este ano seguimos traballando no coidado do medio, facendo especial fincapé na recollida selectiva de papel, plásticos, pilas... así como tamén, na reciclaxe de residuos orgánicos na hora da merenda para a elaboración do compost e usalo nos bancais.
Aquí tendes 2 cortos relacionados con este tema que poden servirnos de inspiración para continuar mellorando as nosas accións:


domingo, 22 de maio de 2022

"Mural das Letras"

As actividades das Letras Galegas xa remataron e o Mural quedou listo para que todos poidan desfrutar do fermoso resultado. Foron días de movemento na Biblioteca, curso a curso participaron na Busca do Tesouro e foron engadindo as pezas que cada equipo atopaba. 
A busca comezaba na biblioteca, onde cada equipo tiña que descifrar a pista que se lle entregaba. Cando atopaban a súa peza, debían volver á biblioteca e vendo o código escrito por detrás, buscaban o seu lugar e pegaban na plantilla do mural. Pouco a pouco fomos completando ata telo rematado.






Clicando na seguinte imaxe chegaredes ao vídeo da montaxe


martes, 17 de maio de 2022

"Exposición Mes do Libro"

Como remate de Abril,  Mes do Libro, fixemos unha exposición con todas as tarxetas que os rapaces e rapazas trouxeron da casa. 
Como ben sabedes, dentro das actividades programadas para este ano, solicitamos a colaboración das familias, para que todo o alumnado elaborase unha ficha técnica dunha planta de horto-xardín. 
Aquí tendes o fermoso resultado, posible grazas á colaboración de todas e todos. 
Moitas grazas pola vosa axuda e aportacións.

 

domingo, 1 de maio de 2022

"LETRAS GALEGAS 2022"

Xa estamos no mes de Maio, e como sabedes o martes 17, celébrase o Día das Letras Galegas. O autor homenaxeado este ano é Florencio Delgado, abogado e poeta galego exiliado. 

Un dos seus traballos máis importantes foi a creación, xunto con outros emigrantes galegos, dunha grande rede cultural galega en México, país no cal pasou unha boa parte da súa vida.

Deuse a coñecer como poeta co seu libro Bebedeira e foi un dos fundadores da revista Vieiros, ademais de participar na publicación da revista Saudade.
Nos seguintes enlaces podemos consultar a súa biografía e obra:

No cole celebraremos esta data traballando arredor do autor homenaxeado e do proxecto deste curso:
 "Horta-Xardín de Piquín".
Este ano, teremos de novo unha proposta de actividades que poderá realizarse de xeito virtual e/ou en papel. 
Esta proposta se completará cunha "Busca do Tesouro" que partirá da Biblioteca a diferentes recunchos do cole. O obxectivo final é a elaboración dun mural das Letras Galegas sobre Florencio Delgado que iremos completando entre todas e todos coas pezas que conseguiremos na Busca do Tesouro.

Para poder acceder ás actividades virtuais podedes premer nas fotos ou nos enlaces correspondentes a cada nivel e chegaredes axiña:



sábado, 30 de abril de 2022

"Piquín Horticultor"

O venres, Piquín recibiu un agasallo mooooooi especial😀

Diego, Adrián e Clara trouxéronlle un fermoso cadro de parte deles e a súa familia. Trátase dunha reprodución en madeira do noso Piquín Horticultor. 
Piquín quedou encantado, é un verdadeiro pracer verse reflectido nun traballo tan lindo e delicado.
¡¡¡Moitíiiiiisimas GRAZAS Diego, Adrián, Clara e familia!!!




venres, 29 de abril de 2022

"Apadriñamentos no Mes do Libro 2022"

O mes de Abril acabou cunha linda sorpresa para os máis pequenos e pequenas do cole.
O alumnado de 5º e 6º de Primaria preparou con moito agarimo contos para contar no patio ao 1º ciclo e Ed. Infantil. Aproveitando o bo tempo, saímos e poidemos desfrutar da escoita e da súa compañía. Gustounos moito escoitalos. 
Grazas a todas e todos por compartir ese ratiño.


venres, 1 de abril de 2022

"Mes do libro 2022"

Como cada ano ao longo deste mes de abril  temos de protagonista: "O LIBRO".
Neste mes recordamos títulos e por suposto autores que están na mente de todos e todas. Faise mención especial ao libro infantil e xuvenil no día 2 de abril, data na que naceu Hans Christian Andersen no 1805. Este escritor e poeta danés é coñecido  mundialmente polos seus contos para nenos e nenas. A IBBY declarou esta data Día Internacional do Libro Infantil e así lembrar a importancia de ofrecer libros axeitados a todos os nenos e nenas que os axuden a medrar como lectores e como persoas.        

23 de abril é a 2ª data simbólica do mes no mundo da literatura. Nese día, no ano 1616, morreron Miguel de Cervantes, William Shakespeare e o poeta Garcilaso de la Vega. Este é o motivo polo cal a UNESCO elixiu esta data para rendir homenaxe ao libro e aos autores.

Ao longo deste ABRIL e para celebrar estas datas especiais, teremos no cole as seguintes actividades:
- Apadriñamento lector por parte do alumnado do 3º ciclo
- Exposición de fichas técnicas de plantas de Horto-Xardín feitas coa colaboración das familias
- Exposición temática e de novidades relacionadas co libro
Agora e para endulzar estes días, aquí vos deixamos uns vídeos relacionados cos libros e a lectura




mércores, 23 de marzo de 2022

"Salón do Libro 2022"

Este ano o "Salón do Libro" está relacionado coa "ARTE" e como en Ed. Infantil temos grandes artistas, entre todas e todos fixemos unha reproducción da Horta-Xardín de Piquín e un fermoso conto.
O conto foi elaborado seguindo a idea de "A Horta de Simón" de Rocío Alejandro da editorial Kalandraka e agora está exposto no Salón do Libro xunto cos traballos doutros centros.
Aquí vos deixamos a nosa HORTA-XARDÍN e o conto feito polo alumnado 



Para rematar o traballo fixemos unha visita ao Salón onde nos estaba esperando Orbil, que como sabemos é un gran amigo de Piquín.

"Piquín na horta-xardín"

Esta semana Piquín  foi visitar os traballos da Horta-Xardín e mentres revisaba os bancais e as plantacións feitas en cada un, sacouse unhas fermosas fotos.