"Mochilas Viaxeiras"

O pasado domingo, 24 de Outubro, celebrouse o Día das Bibliotecas Escolares, e por iso, nesta semana botan a andar as nosas "Mochilas Viaxeiras".

Son 33 as mochilas que neste curso irán rotando de casa en casa, dende 5º de Ed. Infantil ata 6º de Ed. Primaria. Esperamos que disfrutedes da súa estancia entre vós. 

Xorden coa idea de fomentar a lectura en familia e por iso nelas atoparedes materiais para grandes e pequenos. 

Revisade a Guía de Uso que as acompaña e recordade que os materiais que levan son Pequenos Tesouros que temos que coidar.

Agardamos os vosos comentarios e as novas que consideredes oportunas engadir na carpeta.

"Día das Bibliotecas Escolares 21-22"

A biblioteca escolar é uns dos principais recursos do centro educativo. Polos seus obxectivos, polos servizos, polo seu funcionamento, a biblioteca escolar debe ser un centro de recursos de lectura, información e aprendizaxe e ademais contribúe á adquisición de todas as competencias básicas do currículo.

O 24 de OUTUBRO celébrase o "Día das Bibliotecas Escolares".

Para esta data Piquín quere agasallarnos deixándonos un pequeno vídeo e a foto co lema deste ano que é o seguinte:

"A biblioteca escolar ten a palabra"

Para ler máis...
BLOG DE BIBLIOTECAS ESCOLARES DE GALICIA

¡¡¡Abrimos de novo!!!

Ola a todas e todos
Aquí estou de novo, son eu, ¡¡¡PIQUÍN!!!

¡Teño todo disposto para abrir a biblio! 

Estou desexando que veñades visitarme, aínda que este ano teremos que seguir as instrucións con especial atención aínda.

Estará aberta nos recreos e poderedes visitala nos días que teñades asignados para cada curso.

Supoño que estaredes desexando saber sobre o que imos traballar este ano. 

Pois aquí tendes o título do novo proxecto: 

"HORTO-XARDÍN DE PIQUÍN"

Desta volta... queda clariño sobre que imos investigar?

Non precisades de moitas pistas, a que non? 

Imos crear o noso horto-xardín, farémolo coa axuda de todas e todos. No apartado de proxectos tendes xa algúns recursos que iremos ampliando e podedes utilizar.

Tamén me gustaría que deseñarades uns cadernos de campo e neles vaiades recollendo o traballo feito ao longo do curso. Así que, esta sería unha boa tarefa para comezar.

E por último, aquí vos deixo algún que outro vídeo que agardo desfrutedes:

"Plan de adaptación Covid-19" curso 21-22

"Contos dos nenos e nenas de 6º"

Os nenos e nenas de 6º rematan a súa etapa no cole. Antes de marchar quixeron agasallarnos con fermosas historias contadas para os máis pequenos.

Un grupo, decidiu crear as súas propias historias para contar, aquí volas deixamos:

 

O outro grupo, fixo 2 estupendas versións dos seguintes contos:

 

Moitas Grazas a todas e todos eles e Moita Sorte no seu camiño.

Clicando na seguinte imaxe podedes ver as fotos destas xornadas:

"Lecturas para este Verán 21"

Xuño chegou e as vacacións de verán a puntiño están. Ben quentiñas aínda, aquí van as nosas recomendacións de lectura para acompañar aos vosos plans. Podemos ler na praia, na casa, no xardín, no parque, no monte...e sempre viaxar lonxe, moi lonxe, ata o espazo e máis alá, cun bo libro nas mans.

"Día Mundial do Medio Ambiente 2021"

O día 5 de Xuño celébrase o "Día Mundial do Medio Ambiente", centrado na restauración de ecosistemas co lema: "Reimaxina, recrea, restaura". Este ano, unha data especial no noso cole, xa que levamos todo o curso traballando arredor do coidado do Medio Ambiente e do Cambio Climático.

Coas propostas desenvoltas arredor do proxecto Co Cambio todo Cambia, cremos que fomos quen de sensibilizar ao noso alumnado sobre a importancia do coidado da nosa contorna e da natureza en xeral.

Nestes meses fíxose especial fincapé en:

- reciclaxe

- elaboración do compost

- coidado do medio natural: plantas, animais e os seus hábitats

- coñecemento de proxectos, persoas e/ou entidades que traballan para mellorar a situación actual do planeta

- accións encamiñadas a frear o Cambio Climático

Todo isto quedou reflectido en diferentes traballos realizados nas aulas. Unha das últimas propostas levadas a cabo, que resume gran parte do feito no ano, foi a elaboración de carteis arredor desta temática. Aquí vos deixamos un vídeo, feito especialmente para conmemorar esta data, con todos os carteis creados no cole e que ven sendo o peche do noso proxecto anual.

Tamén unha imaxe da nosa exposición no corredor da primeira planta:

Ademais, aquí temos dous estupendos traballos dos nenos e nenas de 6º A. O primeiro deles, un glosario de termos relacionados co Medio Ambiente e o Cambio Climático e o segundo un traballo sobre activistas contra o Cambio:

   

E para que vexades como o proxecto "Co Cambio todo Cambia" foi deixando pegada, aquí tendes fantásticos exemplos de reciclaxe:

- Fermosas bolsas de moda partindo do aproveitamento dunha camiseta e pantalón vellos (instrucións de confección incluídas), iniciativa de 2 nenas de 4º de Primara.

                        

- Lindo mural que fai fincapé nas 3 RRR, (reciclar, reducir, reutilizar), feito por unha nena de 4º de Primaria e o seu irmán de 1º de Primaria.

Grazas a todas e todos por compartir tan estupendas ideas.

"Letras Galegas 21"

Chegamos ao mes de maio e o luns 17, como todos os anos, celébrase o Día das Letras Galegas. 

Este ano a autora homenaxeada é Xela Arias, escritora e tradutora de moitas obras coñecidas. Nacida en Sarria, provincia de Lugo, destacou como poeta, tradutora e polo seu traballo na editorial Xerais. 

O seu traballo fixo que gañase diferentes premios no campo da tradución e levouna a formar parte da Asociación de Tradutores Galegos.

Nos seguintes enlaces podemos consultar a súa biografía e obra:

- Seminario Galán

- O Portal da Língua Galega

- Primavera das Letras

No cole celebraremos esta data traballando arredor da autora homenaxeada e do proxecto deste curso "Co Cambio todo Cambia".

Este ano, a nosa tradicional xincana levárase a cabo nas aulas, poderá realizarse de xeito virtual e/ou en papel. 

Para poder acceder ás actividades virtuais podedes premer nas fotos ou nos enlaces correspondentes a cada nivel e chegaredes axiña:

  LETRAS GALEGAS ED. INFANTIL

  LETRAS GALEGAS 1º/2º/3º ED. PRIMARIA

  LETRAS GALEGAS 4º/5º/6º ED. PRIMARIA

"Día do Libro 2021" - Much Better Now

Hoxe, 23 de Abril, Día do Libro, queremos compartir un fermoso corto en imaxes. 

Axudaravos a descubrir cantas aventuras se poden vivir desfrutando co mundo da lectura.

Aproveitamos para presentarvos os nosos marcapáxinas, entregados ao longo da mañá por todo o cole, tanto ao alumnado como a todo o persoal do centro. Este foi o agasallo de Piquín, a mascota da Biblioteca, co motivo da celebración desta data.

E como non podía ser menos, felicitamos a Piquín pola megafonía, cantándolle "Parabéns para ti", xa que hoxe foi o seu aniversario, 11 anos!!

Deste xeito, e coa visita de varias familias ao longo da semana, como contacontos a diferentes aulas de Ed. Infantil, completamos as actividades do "Mes de Abril, Mes do Libro".

"Exposición Mariscadoras"

Nestas semanas, poidemos gozar no cole dunha fermosa exposición dedicada ás Mariscadoras e o seu traballo. A súa profesión, pouco recoñecida ata agora, queda reflectida nas fotos e ferramentas que forman parte desta exposición itinerante e que nos amosa, unha vez máis, a importante labor das mulleres como un dos principais motores da nosa sociedade. 

Esta exposición forma parte dun proxecto que se está traballando no centro e que pretende resaltar o valor das mulleres en diferentes profesións relacionadas co mar, profesións que dende sempre, foron exercidas na súa maioría polas mulleres das zonas costeiras.

 

 Nas imaxes poidemos apreciar dende os esforzo realizado día a día nos areais ata todo o proceso dende a "semente" da ameixa ata a súa recollida. Tamén recompilamos moitos outros datos de interese e curiosidades, así como o nome das diferentes ferramentas utilizadas para a medida ou a recollida das diferentes especies.